Abzas Media-nın direktoru Ülvi Həsənli aclıq aksiyasını dayandırıb

Abzas Media-nın direktoru Ülvi Həsənli

Tarix: 5 avqust 2025-ci il

Abzas Media-nın direktoru Ülvi Həsənli Penitensiar Xidmətin Umbakı kompleksində 17-ci gün aclıq aksiyasını dayandırıb. O, bu qərarı ailə üzvləri və dostlarının onun səhhətindən narahatlıqlarını nəzərə alaraq verib.

Həsənli aclıq aksiyasına iyulun 20-də, Umbakı kompleksində əsassız həbsinə etiraz əlaməti olaraq başlamışdı. Jurnalist bu müəssisədə üç yaşlı qızı da daxil olmaqla, ailə üzvləri ilə canlı görüşlərdən məhrum edilmişdi.

Avqustun 5-də Həsənli, ailəsi və dostlarının səhhəti ilə bağlı müraciətlərini nəzərə alaraq aclıq aksiyasını dayandırıb. Yaxınlarının bildirdiyinə görə, o, 17 gün ərzində 15 kq çəki itirib və hazırda 63 kq çəkiyə malikdir.

Jurnalistin yaxınları qeyd edib ki, 40 dərəcə istidə, nə pəncərəsi, nə də ventilyasiyası olmayan kamerada saxlanılması səbəbindən Həsənli nəfəs darlığı, ürək döyüntüsünün artması, böyrəklərdə ağrı və qan təzyiqinin aşağı düşməsi kimi problemlərlə üzləşib.

Orqanizminin zəifləməsi və tibbi yardımın olmaması şəraitində, ailə üzvləri və dostları Həsənlidən səhhətini daha çox riskə atmamağı israrla xahiş ediblər. O, bu müraciətləri nəzərə alaraq, avqustun 5-də, aclıq aksiyasının 17-ci günü etiraz aksiyasını dayandırıb.

Həsənlinin qərarına, həmçinin, Abzas Media işi üzrə apellyasiya məhkəməsinin ilkin iclasının avqustun 12-nə təyin edilməsi də təsir göstərib. Həsənli ümid edir ki, Bakı Apellyasiya Məhkəməsinin hakimləri onun Bakı İstintaq Təcridxanası-1-ə qaytarılmasını təmin edəcəklər, çünki hökmə əsasən, o, şikayətə baxılma başa çatana qədər orada saxlanılmalıdır.

Abzas Media onlayn nəşrinin beş əməkdaşı – direktor Ülvi Həsənli, baş redaktor Sevinc Vaqifqızı, tərcüməçi Məhəmməd Kəkalov, müxbirlər Nərgiz Absalamova və Elnarə Qasımova, həmçinin Turan İnformasiya Agentliyinin iqtisadiyyat şöbəsinin müdiri, araşdırmaçı jurnalist Hafiz Babalı 2023-cü ilin noyabrından 2024-cü ilin yanvarına qədər valyuta qaçaqmalçılığı ittihamı ilə həbs olunublar. 2024-cü ilin iyununda Azərbaycan "Radio Azadlıq" xidmətinin iqtisadi şərhçisi Fərid Mehralızadə də bu işlə əlaqədar həbs edilib.

2024-cü ilin avqustunda aparılan ilkin istintaqın nəticəsində iş üzrə fiqurantlara Azərbaycan Cinayət Məcəlləsinin daha altı maddəsi ilə ittiham irəli sürülüb. Onlar ittihamları rədd edərək, jurnalist araşdırmalarına görə təqib edildiklərini bildiriblər.

2025-ci il iyunun 20-də məhkəmə Abzas Media-nın jurnalistləri və əməkdaşlarını uzunmüddətli həbs cəzalarına məhkum edib. Nəşrin direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və iqtisadçı Fərid Mehralızadə hərəyə 9 il, Nərgiz Absalamova və Elnarə Qasımova hərəyə 8 il, Məhəmməd Kəkalov isə 6,5 il azadlıqdan məhrum edilib.

Abzas Media işi, 2023-cü ilin noyabrından etibarən Azərbaycanda müstəqil media nümayəndələrinin həbslər seriyasının başlanğıcı oldu. Buna bənzər ssenari ilə, o cümlədən Toplum Tv və Meydan Tv kimi müstəqil onlayn resursların əməkdaşlarının kollektiv həbsləri də daxil olmaqla, bir neçə cinayət işi başlanılıb.