AİHM "Azadlıq" qəzetinin hüquqlarının pozulmasını tanıdı

"Azadlıq" qəzeti

İnsan Hüquqları üzrə Avropa Məhkəməsi (AİHM) "Azadlıq" qəzetinə Bakı Metropoliteninin fəaliyyəti barədə 2012-ci ildə dərc etdiyi yazıya görə kəsilən cəriməni ifadə azadlığı hüququnun pozulması kimi tanıdı. Strasburq Məhkəməsi qəzetə 29,5 min avro məbləğində təzminat ödənilməsi barədə qərar çıxarıb.

Şikayət Azərbaycanda "Azadlıq" qəzetinə Bakı Metropoliteni barədə tənqidi yazıya görə pul cəriməsi kəsilməsi ilə bağlı idi.

Bakı Metropoliteninin rəhbərliyinin "Azadlıq" qəzetinə qarşı qaldırdığı iddianın əsas predmeti 2012-ci il aprelin 8-də " [TA] beş qəpik mənimsəyib" başlığı ilə dərc olunan yazı olub. Məqalədə deyilirdi ki, metro gediş haqqının bahalaşmasından sonra sərnişin kartlarının balansında 0,05 manat (o vaxtkı kursla 0,6 sent) məbləğində qalıq qalmış və sonda bu vəsaitlər Bakı Metropoliteninin rəhbərliyi tərəfindən silinərək mənimsənilmişdir.

Məqalədə, həmçinin, Bakı Metropoliteninin fəaliyyətinə, gəlirlərinə və xərclərinə nəzarətin və yoxlamanın olmaması qeyd edilirdi ki, bu da "oğurluqları aşkar edə bilərdi".

Bu yazı ilə əlaqədar Bakı Metropoliteninin rəhbərliyi "Azadlıq" qəzetindən 30 min manat (o vaxtkı kursla təqribən 30 min avro) məbləğində pul qazanmışdı. Yuxarı məhkəmə instansiyaları "Azadlıq" qəzetinin şikayətini rədd etmişdi. Göstərilən məbləğ qəzetin bank hesabından silinmiş, bu da nəşrin iqtisadi vəziyyətini ağırlaşdırmış və nəticədə 2016-cı ildən onun çap versiyasının dayandırılmasına səbəb olmuşdu.

AİHM araşdırması zamanı "Azadlıq" qəzetinin İnsan Hüquqları üzrə Avropa Konvensiyasının 10-cu (ifadə azadlığı) maddəsi ilə müəyyən edilmiş hüquqlarının pozulmasını müəyyən etdi və redaksiyaya kompensasiya olaraq 25 min avro – maddi ziyan, 3 min avro – mənəvi ziyan və məhkəmə xərclərinin ödənilməsi üçün 1500 avro – cəmi 29 500 avro ödənilməsi barədə qərar verdi.

"Azadlıq" qəzeti hazırda elektron formada xaricdən nəşr olunur.