Apellyasiya Məhkəməsi Məmməd İbrahimin Həbsini Qüvvədə Saxladı

Məmməd İbrahim

Dekabrın 8-də Bakı Apellyasiya Məhkəməsi (BAM) Azərbaycan Xalq Cəbhəsi Partiyası (AXCP) Rəyasət Heyətinin üzvü Məmməd İbrahimin həbsi ilə bağlı şikayəti təmin etməyib.

Partiya hesab edir ki, bu qərarın "hüquqi əsasları yoxdur" və "siyasi sifarişin icrasıdır".

"Şikayətə baxılan zaman Bakı Apellyasiya Məhkəməsinin binası polis tərəfindən mühasirəyə alınıb və Məmməd İbrahimi dəstəkləməyə gələn şəxslər ərazidən güc tətbiq edilməklə uzaqlaşdırılıb. AXCP bəyan edir ki, Apellyasiya Məhkəməsinin Məmməd İbrahimlə bağlı qərarı hüquqa deyil, siyasi sifarişə əsaslanır. Buna görə də, AXCP bu qərarı pisləyir və AXCP sədri Əli Kərimlinin, Məmməd İbrahimin və digər bütün siyasi məhbusların dərhal azad edilməsini tələb edir", - AXCP-nin bəyanatında daha sonra deyilir.

Partiya, Əli Kərimlinin apellyasiya şikayətinə baxılarkən olduğu kimi, "məhkəməyə gələn insanlara qarşı polisin yenidən istifadəsini" də pisləyib.

AXCP hakimiyyəti "güc orqanlarını siyasi repressiya alətinə çevirməməyə" çağırıb.

"Azərbaycanda siyasi, ictimai və insan haqları fəaliyyəti üçün bütün çətinliklərə baxmayaraq, AXCP Əli Kərimli başda olmaqla ölkənin bütün siyasi məhbuslarının müdafiəsi uğrunda mübarizəni davam etdirəcək", - bəyanatda daha sonra bildirilir.

Noyabrın 29-da Dövlət Təhlükəsizliyi Xidmətinin əməkdaşları axtarışlardan sonra Azərbaycan Xalq Cəbhəsi Partiyasının (AXCP) lideri Əli Kərimlini və onun müşaviri - AXCP Rəyasət Heyətinin üzvü Məmməd İbrahimi saxlayıblar. Onlar hakimiyyəti zorla ələ keçirməyə yönəlmiş hərəkətlərdə ittiham olunublar. Partiya, saxlanılmaları siyasi motivli adlandırıb və bunu hakimiyyətin "Azərbaycanda son müstəqil siyasi qüvvəni məhv etmək" cəhdi kimi qiymətləndirib. Dekabrın 1-də məhkəmə hər ikisini 2,5 ay müddətinə həbs edib. Dekabrın 5-də apellyasiya məhkəməsi Kərimlinin həbsini qüvvədə saxlayıb.