BMT: Dünya əhalisinin dörddə birinin təhlükəsiz içməli suya və kanalizasiyaya çıxışı yoxdur

Çərşənbə axşamı, avqustun 26-da açıqlanan BMT hesabatına görə, son on ildə əldə edilmiş irəliləyişlərə baxmayaraq, dünyada milyardlarla insanın hələ də təhlükəsiz içməli su, kanalizasiya və gigiyenadan məhrum olması onları xəstəliklərə və sosial təcrid vəziyyətinə salır.

Ümumdünya Səhiyyə Təşkilatı (ÜST) və Birləşmiş Millətlər Təşkilatının Uşaq Fondunun (UNİCEF) Ümumdünya Su Həftəsini qeyd etmək üçün açıqladığı hesabatda ən böyük bərabərsizliklərlə üzləşən həssas icmalar üçün davamlı su təhlükəsizliyi problemi vurğulanır.

Təxminən 2,1 milyard insanın hələ də təhlükəsiz içməli suya çıxışı yoxdur, dünyada 106 milyon insan təmizlənməmiş mənbələrdən istifadə etməyə məcburdur.

ÜST-nin Ətraf Mühit, İqlim Dəyişikliyi və Sağlamlıq Departamentinin direktoru Rüdiger Kretç su, kanalizasiya və gigiyena imtiyazlar deyil, fundamental insan hüquqları olduğunu bildirib. Hesabatda göstərilirdi ki, ən az inkişaf etmiş ölkələrdə insanların əsas içməli su və kanalizasiyadan məhrum olma ehtimalı digər ölkələrlə müqayisədə iki dəfə, əsas gigiyenadan məhrum olma ehtimalı isə üç dəfə çoxdur. Təxminən 1,7 milyard insan hələ də evdə əsas gigiyenadan məhrumdur, o cümlədən 611 milyon insanın ümumiyyətlə çıxışı yoxdur. BMT Davamlı İnkişaf Məqsədlərinə nail olmaq üçün ən çox təcrid olunmuş icmalar üçün sürətləndirilmiş fəaliyyətə çağırıb. Hesabatda deyilir: “Hazırkı sürətlə hər bir uşağa təhlükəsiz su və kanalizasiya ilə çatmaq vədi azalır və bizə xatırladır ki, ona ən çox ehtiyacı olanlara kömək etmək üçün daha sürətli və daha cəsarətli hərəkət etməliyik”.