Azərbaycanda müxalifətçinin taleyindən narahatlıq – yaxınları əlaqə qura bilmir

Sahib Mamedzade

Azərbaycanda həbs olunmuş müxalifətçi Sahib Məmmədzadənin yaxınları onun taleyi ilə bağlı narahatdırlar. Artıq bir həftədir ki, o, cəzaçəkmə müəssisəsindən zəng etmir.

Onlar ehtiyat edirlər ki, müxalifətçi karserə salına bilər.

Narkotiklərlə bağlı iş üzrə məhkum edilmiş Azərbaycan Xalq Cəbhəsi Partiyasının Daşkəsən rayon təşkilatının sədri Sahib Məmmədzadənin yaxınları bildiriblər ki, o, artıq bir həftədir ailəsi ilə əlaqə saxlamır.

Onların sözlərinə görə, apellyasiya məhkəməsinin qərarından sonra Sahib koloniya rejiminə yox, Bakının Ümbəki qəsəbəsindəki penitensiar kompleksə köçürülüb.

“Bu müəssisədə saxlanma şəraiti çox sərtdir. Məhbuslara yalnız gündə iki saat açıq havada gəzməyə icazə verilir. Bir müddət əvvəl Sahibin kamerasına təxribatçı yerləşdirilmişdi. Həmin şəxs onu qarşıdurmaya çəkməyə çalışıb. Halbuki, apellyasiya qərarından sonra onu gündəlik hərəkətə icazə verilən ümumi rejimli koloniyaya köçürməli idilər,” – deyə bacısı Tacirə Məmmədzadə bildirib.

Onun sözlərinə görə, ailə üzvləri ehtiyat edirlər ki, Sahib karserə salına bilər.

Penitensiar Xidmətlə əlaqə saxlamaq və şərh almaq mümkün olmayıb.

Sahib Məmmədzadə 18 mart 2024-cü ildə Daşkəsən rayonu ərazisində polis postunda saxlanıldıqdan sonra maskalı şəxslər tərəfindən döyülərək naməlum istiqamətə aparılıb. Daha sonra ona qarşı narkotik maddələrin qanunsuz dövriyyəsi ittihamı irəli sürülüb.

2024-cü il 10 dekabr tarixində Sahib Məmmədzadə 6 il 6 ay müddətinə azadlıqdan məhrum edilib. 2025-ci il 7 mart tarixində apellyasiya məhkəməsi bu müddəti 3 il 6 aya endirib.

Məmmədzadə ittihamları rədd edib və bildirib ki, yerli məmurların örüş sahələrini zəbt etməsinə qarşı kəndlilərin etirazlarını sosial şəbəkələrdə yaydığı üçün təqib olunur.

Hüquq müdafiəçiləri Sahib Məmmədzadəni siyasi məhbus kimi tanıyıblar.