Nazir Cabbarov amnistiyanın qanunsuz tikintilərin artmasına səbəb ola biləcəyini bildirdi

Nazir Mikayıl Cabbarov

"İcazəsiz tikililərə birbaşa amnistiyanın tətbiq edilməsi müəyyən sosial problemləri müvəqqəti həll etsə də, gələcəkdə daha çox qanunsuz tikintinin aparılmasını stimullaşdıra bilər." AZƏRTAC-ın məlumatına görə, İqtisadiyyat naziri Mikayıl Cabbarov bu fikirləri mayın 20-də "Qlobal miqyasda qeyri-rəsmi məskunlaşma yerləri və daxmaların mənzillərlə əvəzlənməsi" mövzusuna həsr olunmuş tədbirdə çıxışı zamanı səsləndirib.

Nazir vurğulayıb ki, son bir neçə il ərzində çoxmənzilli yaşayış binalarına icazələrin verilməsi proseslərinin sadələşdirilməsi istiqamətində bir sıra mühüm tədbirlər həyata keçirilib.

"Biz həmçinin fundamental şəhərsalma tələblərinə cavab verən fərdi evlər və buna bənzər digər qeyri-rəsmi icmalar üçün xüsusi amnistiyalar tətbiq etmişik." Buna baxmayaraq, təcrübəmiz göstərir ki, leqallaşdırma mövzusuna olduqca həssas yanaşmaq lazımdır. "İcazəsiz tikililər üçün sadə bir amnistiya bəzi sosial problemləri müvəqqəti həll edə bilsə də, gələcəkdə yeni qanunsuz tikintilərə rəvac verə bilər", - deyə o, sözlərinə davam edib.

Nazir qeyd edib ki, bu, təhlükəli evlərin tikilməsinə, torpaqdan düzgün istifadə edilməməsinə, eləcə də kənd təsərrüfatı torpaqlarına, meşələrə, su ehtiyatlarına və mühüm infrastruktura ziyan dəyməsinə səbəb ola bilər.

Sənədsiz evlər məsələsi uzun illərdir ki, Azərbaycanda müzakirə mövzusudur. Bəzi ekspertlərin hesablamalarına görə, təkcə Bakı şəhərində təxminən 500 min qanunsuz ev var. 2011-yilın martında Bakı Şəhər İcra Hakimiyyətində keçirilən iclasda Prezident İlham Əliyev rəsmi icazə olmadan tikilmiş evlərin qeydiyyata alınması barədə xüsusi tapşırıq verdiyini bəyan etmişdi. 2019-cu ilin mayında Bakı Şəhər İcra Hakimiyyətinin başçısı Eldar Əzizov Prezident Əliyevin onunla şəxsən görüşdüyünü və yerlərdə görüşlər keçirməyi tapşırdığını bildirmişdi: "Bəzi sakinlər 10, 20 və ya 30 ildir yaşadıqları evləri leqallaşdıra bilmirlər." Məsələ ilə bağlı komissiya yaradılıb. Prezident İlham Əliyev tərəfindən mühüm sənəd hazırlanır. Əminəm ki, sənədsiz evlər problemi bütün ölkə miqyasında qəti şəkildə həllini tapacaq.

Buna baxmayaraq, problem hələ də həll olunmamış qalır.

Müstəqil ekspertlər hesab edirlər ki, hakimiyyət orqanları müəyyən siyasi səbəblərdən bu problemin həlli məsələsini vaxtaşırı olaraq gündəmə gətirir. Onların fikrincə, hökumət illər ərzində nəinki bu problemi həll edə bilməyib, həm də vəziyyətin daha da pisləşməsinə göz yumub.