Fərid Mehrəlizadə ABŞ Milli Mətbuat Klubunun mükafatına layiq görülüb

Fərid Mehrəlizadə

Hazırda Azərbaycan həbsxanasında cəza çəkən jurnalist Fərid Mehrəlizadə, ABŞ Milli Mətbuat Klubu tərəfindən 2025-ci il Con Obuşon Mətbuat Azadlığı Mükafatı ilə təltif edilən 9 jurnalistdən biridir. Bu jurnalistlərin hamısı ABŞ Qlobal Media Agentliyi (USAGM) ilə əlaqəli olub və agentliyin 2025-ci ilin əvvəlində ləğv edilməsindən sonra xaricdəki həbsxanalarda qalırlar.

Milli Mətbuat Klubunun bəyanatında deyilir: "Klubun İdarə Heyəti razılaşdı ki, bu mükafat həm jurnalistlər üçün tez-tez təhlükəli olan dünyanın o hissələrində jurnalist fəaliyyəti ilə məşğul olan jurnalistlərin cəsarətinə hörmət göstərmək, həm də Birləşmiş Ştatlar hökumətinin ABŞ-da söz azadlığı ideallarını təbliğ edən işlərinə görə həbs olunan müxbirləri qoruya bilməməsinə diqqət çəkmək məqsədi daşıyır."

Milli Mətbuat Klubunun mərhum prezidenti Con Obuşonun adını daşıyan Obuşon Mükafatı, təşkilatın mətbuat azadlığı sahəsində ən yüksək mükafatıdır. O, hər il həqiqət axtarışında həyatlarını və azadlıqlarını riskə atan həm ABŞ-da, həm də xaricdəki jurnalistlərə təqdim olunur. Mehrəlizadədən başqa, səkkiz başqa jurnalist də mükafata layiq görülüb, onlardan ikisi Myanmadan, beşi Vyetnamdan, eləcə də xarici təşkilatla məxfi əməkdaşlığa görə dörd il həbs cəzası alan Rusiya vətəndaşı Nika Novak da daxildir.

Milli Mətbuat Klubunun prezidenti Mayk Balzamo bildirib: "Onların həbsdə olması Amerikanın azadlığa sadiqliyinə inanan hər kəsi qəzəbləndirməlidir. Bu müxbirlər Amerikanın şəffaflıq və söz azadlığı dəyərlərini təbliğ edirdilər, lakin onlar arxada qaldılar. Onların tərk edilməsi ölkəmizin reputasiyasına ləkədir və mətbuat azadlığını müdafiə etməkdən çəkindiyimiz zaman nə baş verdiyini xatırladır."

Mehrəlizadə 2024-cü ilin iyun ayında Abzas Media işi ilə əlaqədar həbs edilib. 20 iyun 2025-ci ildə məhkəmə Azərbaycanın onlayn nəşri olan Abzas Media-nın jurnalistləri və əməkdaşları üçün uzunmüddətli həbs cəzası qərarını çıxardı. Nəşrin direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və iqtisadçı Fərid Mehrəlizadə hər biri 9 il, Nərgiz Absalamova və Elnarə Qasımova hər biri 8 il, Məhəmməd Kəkalov isə 7 il müddətinə azadlıqdan məhrum edilib. Sentyabrın 9-da Apellyasiya Məhkəməsi hökmü qüvvədə saxladı.

Mehrəlizadənin həyat yoldaşı, fəal Nərgiz Muxtarova da cinayət məsuliyyətinə cəlb edilib. O, polis nəzarəti altındadır və Bakı Ağır Cinayətlər Məhkəməsində "bir sıra yerli və xarici QHT-lərə" qarşı genişmiqyaslı iş üzrə təqsirləndirilən şəxs kimi onun prosesi davam edir.

Qeyd edək ki, ABŞ Nümayəndələr Palatasının İnsan Hüquqları Komissiyasının Demokratlar Partiyasından həmsədri Ceyms MakQovern oktyabrın sonunda Azərbaycan Prezidenti İlham Əliyevə məktub yazaraq Nərgiz Muxtarovanın cinayət təqibi və Fərid Mehrəlizadənin davam edən həbsindən narahatlığını ifadə edib.

Amerikalı Konqresmen məktubda deyib: "Nərgizə qarşı irəli sürülən ittihamlar əsassızdır və görünür, onun əri üzərində onun Konqres tərəfindən maliyyələşdirilən müstəqil jurnalist fəaliyyətinə görə təzyiqin davamıdır. Mən hökumətinizi Nərgizdən ittihamları götürməyə və Fəridi ailəsi ilə birləşə bilməsi üçün azad etməyə çağırıram. Mən xüsusilə bu vəziyyətin Fərid və Nərgizin kiçik qızına təsirindən narahatam. O, atası ədalətsiz yerə həbsdə olarkən doğulub, indi isə anası da həbs təhlükəsi ilə üz-üzədir. Bir yaşlı uşağın valideynsiz qalması perspektivi qəbuledilməzdir."