İqbal Əbilov həbsxanadan Talışşünaslıq almanaxını redaktə edəcək

İqbal Əbilov

Azərbaycanda 18 il müddətinə azadlıqdan məhrum edilmiş talışşünas tədqiqatçı İqbal Əbilov həbsxanadan elmi məcmuəni redaktə etmək niyyətindədir. Onun redaktorluğu ilə Talışşünaslığa dair elmi almanax nəşr olunacaq.

İqbal Əbilovun redaktorluğu ilə Virtual Talış Milli Akademiyası “Acta Talyshica” ("Talış Tədqiqatları") adlı Talışşünaslığa həsr olunmuş multidissiplinar elmi almanax üçün məqalə qəbulu elan edib, bu barədə İqbal Əbilovun Hüquqlarının Müdafiəsi Komitəsinin məlumatında bildirilir.

Nəşrə daha əvvəl dərc olunmamış talış, ingilis, rus və Azərbaycan dillərində tədqiqatlar qəbul edilir.

İşlərin actatalyshica@protonmail.com ünvanına göndərilməsi üçün son tarix 1 fevral 2026-cı ildir.

Komitə qeyd edir ki, "Azərbaycanda belə bir elmi məcmuənin ilk dəfə həbsxana şəraitində hazırlanması simptomatik və nümayişkaranə xarakter daşıyır".

Ağır həbsxana şəraitində saxlanılmasına baxmayaraq, Əbilov elmi tədqiqatlarını davam etdirir.

Komitə bəyanatının sonunda deyilir: "Çünki elmə qarşı cinayət təqibinə, alimə edilən təhdidlərə, onu nüfuzdan salmaq, qaralamaq, cəmiyyətdən təcrid etmək cəhdlərinə yeganə mümkün cavab möhkəm dayanmaq və obyektiv tədqiqatları davam etdirməkdir. Və bu, azad və müstəqil elmi tədqiqatlarla akademik standartların müdafiəsi ilə mümkündür".

Uşaqlıqdan Belarusiyada yaşamış Azərbaycan vətəndaşı İqbal Əbilov 2024-cü ildə əmisi oğlunun toyuna gəlmək üçün Azərbaycana gəlib və Ermənistan xüsusi xidmət orqanları ilə əməkdaşlıq şübhəsi ilə saxlanılıb. Sonradan məhkəmə onu dövlətə xəyanət və milli düşmənçiliyi qızışdırma maddələri ilə təqsirli bilərək Əbilovu 18 il müddətinə azadlıqdan məhrum edib.

Əbilovun yaxınları və hüquq müdafiəçiləri onun Talış mədəniyyəti ilə bağlı tədqiqatlarını təqibin əsl səbəbi hesab edirlər.