QHT rəhbəri Hafiz Həsənovun işi üzrə məhkəmə tarixi müəyyənləşdi

Hafiz Həsənov

Bakı, 10 oktyabr 2025 — “Hüquq və İnkişaf” İctimai Birliyinin sədri Hafiz Həsənova qarşı açılmış cinayət işi üzrə ilkin istintaq başa çatıb. Həsənov geniş rezonans doğuran “QHT işi” üzrə təqsirləndirilən şəxslərdən biridir.

Cinayət işi baxılması üçün Bakı Ağır Cinayətlər Məhkəməsinə göndərilib. İş hakim Eldar İsmayılova həvalə olunub. Məhkəmənin hazırlıq iclası 22 oktyabr tarixinə təyin edilib.

Hafiz Həsənov 2025-ci il martın 14-də həbs olunub və hazırda Binəqədi Rayon Məhkəməsinin qərarı ilə ev dustaqlığı altında saxlanılır.

Həsənova qarşı Cinayət Məcəlləsinin bir neçə maddəsi üzrə ittiham irəli sürülüb:• Maddə 193-1.3.2 — Cinayət yolu ilə əldə edilmiş əmlakın külli miqdarda leqallaşdırılması.• Maddə 308.2 — Ağır nəticələrə səbəb olan vəzifə səlahiyyətlərindən sui-istifadə.• Maddə 313 — Vəzifə saxtakarlığı.

Bu maddələrin cəmi üzrə 12 ilədək azadlıqdan məhrumetmə cəzası nəzərdə tutulur.

“QHT işi”nin ümumi konteksti

“QHT işi” ilə bağlı həbslər 2025-ci ilin mart ayında başlanıb. İlk saxlanılanlar arasında Vətəndaş Hüquqları İnstitutunun rəhbəri Bəşir Süleymanlı və Seçki Monitorinq Alyansının icraçı direktoru Məmməd Alpay da olub. Bəşir Süleymanlının işi üzrə hazırlıq iclası 9 oktyabr 2025-ci ildə keçirilib; məhkəmə prosesi 23 oktyabr tarixinə təyin olunub.

Təqsirləndirilən şəxslərə qarşı ümumi ittihamlar cinayət yolu ilə əldə edilmiş əmlakın leqallaşdırılması, vəzifə səlahiyyətlərindən sui-istifadə və vəzifə saxtakarlığı ilə bağlıdır. “QHT işi” üzrə istintaq çərçivəsində 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri dindirilmişdir.