Vəkil Zabil Qəhrəmanovun həbs müddəti daha 2 ay uzadılıb

Zabil Qəhrəmanov

İstintaq orqanı azərbaycanlı vəkil Zabil Qəhrəmanovun həbs müddətinin daha iki ay uzadılması barədə təqdimat verib. O və müdafiəçiləri həbsin uzadılmasına etirazlarını bildiriblər.

Bakının Səbail Rayon Məhkəməsində keçirilən iclas zamanı istintaqın nümayəndəsi həbs müddətinin uzadılmasını onunla əsaslandırıb ki, Qəhrəmanov azadlıqda qalarsa, "qaça bilər" və "proses iştirakçılarına təsir göstərə bilər".

Lakin Qəhrəmanov və vəkilləri bu iddiaların, eləcə də hüquqşünasa qarşı irəli sürülən ittihamların tamamilə əsassız olduğunu qeyd ediblər. Buna baxmayaraq, Səbail Məhkəməsi istintaq orqanının təqdimatını təmin edərək Qəhrəmanovun həbsdə saxlanılma müddətini daha iki ay artırıb. Yanvarın 19-da müdafiə tərəfi həbs müddətinin uzadılması barədə məhkəmə qərarından apellyasiya şikayəti verib.

Oktyabrın 25-də Gəncə Şəhər Məhkəməsi vəkil Zabil Qəhrəmanov barəsində 3 ay müddətinə həbs qətimkan tədbiri seçmişdi.

Qəhrəmanova qarşı Azərbaycan Respublikası Cinayət Məcəlləsinin 221.2.2 (hakimiyyət nümayəndəsinə və ya digər şəxsə müqavimət göstərməklə xuliqanlıq) və 178.2.4 (xeyli miqdarda ziyan vurmaqla dələduzluq) maddələri ilə ittiham irəli sürülüb. Bu maddələr üzrə Qəhrəmanovu 7 ilə qədər azadlıqdan məhrumetmə cəzası gözləyir.

Qəhrəmanov bir neçə tanınmış işdə, o cümlədən 11 yaşlı Nərmin Quliyevanın qaçırılması və qətlində ittiham olunan İlkin Süleymanovun və qətlə görə 11 il müddətinə azadlıqdan məhrum edilib 4 il sonra bəraət alan Polad İsmayılovun vəkili kimi çıxış edib. O, həmçinin Sahib Məmmədzadə, Şahin Hacıyev və digər müxalifətçilərin maraqlarını təmsil edib.