Azərbaycanda Məhkum Olunmuş Jurnalistin Həyat Yoldaşının Ölkədən Çıxmasına İcazə Verilməyib

Ülvi Həsənli

Azərbaycanda məhkum olunmuş "Abzas Media"nın direktoru Ülvi Həsənlinin həyat yoldaşı Rubabə Quliyeva sentyabrın 29-da Strasburqda, Avropa Şurası Parlament Assambleyasında (AŞPA) keçiriləcək və həyat yoldaşının namizədlərdən biri olduğu Vatslav Havel İnsan Hüquqları Mükafatının təqdimetmə mərasimində iştirak edə bilməyəcək.

Azərbaycan hakimiyyəti onun ölkədən çıxışına mane olub.

Sentyabrın 28-də Quliyeva, Havel Mükafatının təqdimetmə mərasiminin təşkilatçıları tərəfindən dəvət olunduğu Strasburqa Bakıdan uça bilməyib.

Bakı Hava Limanının pasport nəzarətində ona Azərbaycan Daxili İşlər Nazirliyi (DİN) tərəfindən ölkədən çıxışına qadağa qoyulduğu bildirilib.

Bununla belə, Quliyevaya hüquqlarının hansı iş üzrə məhdudlaşdırıldığı barədə heç bir izahat verilməyib.

O, "Abzas Media" işini aparan Bakı Şəhər Baş Polis İdarəsinin müstəntiqi Samir İsmayılovla əlaqə saxlayıb.

Lakin müstəntiq Quliyevanın Azərbaycandan çıxışına qadağa qoyulması barədə məlumatı olmadığını bildirib.

Azərbaycan DİN-dən şərh almaq mümkün olmayıb.

Ülvi Həsənli iqtisadi cinayətlər ittihamı ilə 9 il müddətinə azadlıqdan məhrum edilib.

Havel Mükafatı Avropada və ondan kənarda insan hüquqlarının müdafiəsi sahəsində görkəmli xidmətlərə görə hər il verilən mükafatdır. O, 2013-cü ildən Avropa Şurası Parlament Assambleyası, Vatslav Havel Kitabxanası və Charta 77 Fondu tərəfindən birgə təqdim edilir. Mükafat 60 000 avro, bir kubok və bir diplomdan ibarətdir.

Bu il Həsənli ilə yanaşı, namizədlərin qısa siyahısına Gürcüstandan olan "Netgazeti" və "Batumelebi" qəzetlərinin təsisçisi və direktoru Mzia Amaqlobeli və ukraynalı jurnalist Maksim Butkeviç də daxil edilib.