Abzas Media Jurnalistləri Uzaq Əraziyə Köçürüldü

Həbsdə olan Abzas Media jurnalistləri Sevinc Vaqifqızı, Nərgiz Absalamova və Elnarə Qasımova Bakı İstintaq Təcridxanasından Azərbaycanın cənubunda, paytaxt Bakıdan 250 km uzaqlıqda yerləşən Qurumba kəndindəki cəzaçəkmə kompleksinə köçürülüb. Bu barədə onların yaxınları məlumat verib.

Onların sözlərinə görə, xanımlara yalnız saat 9:00-da başqa yerə köçürüldükləri bildirilib və yığışmaq üçün cəmi 1 saat vaxt verilib. Onlar Lənkərana gətirilənə qədər hara aparıldıqlarını bilməyiblər.

Jurnalistlər onların uzaq bir əraziyə köçürülməsini siyasi təzyiq vasitəsi və xarici aləmdən maksimum dərəcədə təcrid etmək cəhdi kimi qiymətləndirirlər.

Məhkumların uzaq bir koloniyaya göndərilməsi onların yaxınları və vəkilləri üçün də çətinliklər yaradır.

Vəkil Fariz Namazlının sözlərinə görə, Avropa İnsan Hüquqları Məhkəməsinin (AİHM) presedent qərarları müəyyən edir ki, “həbs cəzasının çəkilməsi məhkumun ailəsindən qoparılması vasitəsi olmamalıdır.”

Vəkil Facebook-da yazıb: “Əksinə, dövlətin vəzifəsi məhkumun ailə və sosial əlaqələrini qorumaq, onun reabilitasiyasını dəstəkləməkdir. AİHM müəyyən edir ki, məhbusun yaşayış yerindən uzaqda yerləşən, ailəsinin onunla görüşə bilmədiyi bir müəssisəyə göndərilməsi sadəcə “həbs həyatının adi çətinliyi” deyil, ailə həyatına müdaxilə təşkil edir və Avropa İnsan Hüquqları Konvensiyasının 8-ci maddəsinin pozulması demək ola bilər. 300 km məsafə ilk baxışdan o qədər də böyük görünməyə bilər, lakin ailənin real imkanları—maliyyə vəziyyəti, şəxsi nəqliyyatın olmaması, sağlamlıq vəziyyəti və digər amillər nəzərə alınmasa, bu məsafə ailə əlaqələrini kəsən bir maneəyə çevrilə bilər. Əks təqdirdə, bir tərəfdən 'ailənin cəzalandırılması', digər tərəfdən isə məhbusun cəmiyyətdən tam təcrid edilməsi praktikası yaranır. Bu, ədalətli deyil və Avropa Konvensiyasının ruhuna uyğun gəlmir.”

Bu işdəki digər fiqurantlar—Ülvi Həsənli, Fərid Mehralızadə, Hafiz Babalı və Məhəmməd Kekalov—hələ birinci instansiya məhkəməsinin qərarından sonra sərt şəraitli Ümbakı cəzaçəkmə kompleksinə köçürülmüşdülər.

Abzas Media internet nəşrinin beş əməkdaşı—direktor Ülvi Həsənli, baş redaktor Sevinc Vaqifqızı, tərcüməçi Məhəmməd Kekalov, müxbirlər Nərgiz Absalamova və Elnarə Qasımova—eləcə də Turan İnformasiya Agentliyinin iqtisadi şöbəsinin müdiri, araşdırmaçı jurnalist Hafiz Babalı, 2023-cü ilin noyabrından 2024-cü ilin yanvarına qədər xarici valyuta qaçaqmalçılığı ittihamı ilə həbs edilmişdilər. Sonradan "Azadlıq Radiosu"nun iqtisadi şərhçisi Fərid Mehralızadə də bu işlə əlaqədar həbs olundu.

İlkin istintaqın nəticələrinə görə, 2024-cü ilin avqustunda işin fiqurantlarına qarşı Azərbaycan Cinayət Məcəlləsinin daha altı maddəsi ilə ittiham irəli sürülüb.

Onlar ittihamları rədd edərək, jurnalist araşdırmalarına görə təqib olunduqlarını bildiriblər.

20 iyun 2025-ci il tarixində məhkəmə Abzas Media Azərbaycan internet nəşrinin jurnalistləri və əməkdaşları haqqında uzunmüddətli cəza hökmü çıxarıb. Nəşrin direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və iqtisadçı Fərid Mehralızadə hər biri 9 il, Nərgiz Absalamova və Elnarə Qasımova hər biri 9 il, Məhəmməd Kekalov isə 7,5 il azadlıqdan məhrum edilib. Bakı Apellyasiya Məhkəməsi sentyabrın 8-də hökmü qüvvədə saxlayıb.

Abzas Media işi, 2023-cü ilin noyabrından başlayaraq Azərbaycanda müstəqil media jurnalistlərinin həbslər silsiləsinin başlanğıcı oldu. Buna bənzər ssenari ilə, Toplum TV və Meydan TV kimi müstəqil onlayn resursların əməkdaşlarının kollektiv həbsləri də daxil olmaqla, bir neçə cinayət işi açılıb.