Afiəddin Məmmədovun Telefonla Əlaqə Hüququ Məhdudlaşdırılıb

Afiəddin Məmmədov

Məlumatlara görə, "İşçi Masası" Həmkarlar İttifaqları Konfederasiyasının sədri və işçi hüquqları müdafiəçisi Afiəddin Məmmədovun saxlanıldığı 2 saylı Cəzaçəkmə Müəssisəsində telefon danışıqları etmək hüququ məhdudlaşdırılıb.

Onun ailəsi bu məlumatı yayıb və bildirib ki, məhdudiyyət Məmmədovun son müsahibəsindən sonra qoyulub. Müsahibə dərc olunduqdan sonra cəzaçəkmə müəssisəsinin rəhbərliyi Məmmədovun bütün zənglərini dayandırıb və hazırda onunla əlaqə qurmaq mümkün deyil.

Rəhbərlik onun "Meydan TV işi" çərçivəsində həbs edilmiş jurnalist Ülviyyə Əli ilə müsahibəsindən narazı qalıb. Həmin müsahibədə Məmmədov həbsxana şəraitinin pis olduğunu və məhbusların lazımi tibbi yardım almadığını bildirmişdi.

"İşçi Masası"nın məlumatına görə, müəssisənin Vüsal Aslanov adlı əməkdaşı Məmmədovun telefondan istifadə etməsinə mane olur, ona təzyiq göstərir və digər məhbusları ona qarşı mübahisələrə təhrik edir.

Ailəsi deyir ki, bir neçə gündür ki, onunla əlaqə saxlaya bilmirlər və səhhəti barədə məlumat yoxdur. Penitensiar Xidmət hələlik bu barədə şərh verməyib.

Həbsxana qaydalarına görə, telefonla danışmaq hüququ cəzanın növündən asılıdır. Müəyyən müddətə azadlıqdan məhrum edilmiş şəxslər həftədə iki dəfə 15 dəqiqə, ömürlük cəza çəkənlər isə həftədə bir dəfə 15 dəqiqə telefonla danışmaq hüququna malikdirlər.

Afiəddin Məmmədov və "İşçi Masası" haqqında

Məmmədov, Azərbaycanda işçi hüquqlarını müdafiə etmək məqsədilə 1 mart 2022-ci ildə yaradılmış "İşçi Masası" Həmkarlar İttifaqları Konfederasiyasına rəhbərlik edir.

Məmmədov işçi hüquqları ilə bağlı etiraz aksiyalarında fəal iştirak edib. Aktivliyinə görə bir dəfə xırda xuliqanlıq və polisə tabe olmamaq ittihamları ilə üzləşərək həbs edilib.

O, ilk dəfə 20 sentyabr 2023-cü ildə tanımadığı şəxsə bıçaqla xəsarət yetirmə ittihamı ilə həbs edilib. Daha sonra Cinayət Məcəlləsinin 126.2.4 (xuliqanlıq niyyətilə qəsdən sağlamlığa ağır zərər vurma), 221.3 (silahla xuliqanlıq) və 228.4 (qanunsuz soyuq silah əldə etmə, satma və ya gəzdirmə) maddələri ilə ittiham olunub. Bu il yanvarın 14-də Bakı Ağır Cinayətlər Məhkəməsi onu 8 il müddətinə azadlıqdan məhrum edib. Məmmədov bu ittihamların yalan və siyasi motivli olduğunu iddia edir.

"İşçi Masası" Həmkarlar İttifaqları Konfederasiyasının üzvlərinin həbsləri 2023-cü ilin avqustunda kuryerlərin etiraz aksiyasından sonra başlayıb. Hazırda dörd üzv həbsdədir: Sədr Afiəddin Məmmədov və üzvlər Ayxan İsrafilov, Elvin Mustafayev və Möhyəddin Orucov.

Yerli hüquq müdafiəçiləri "İşçi Masası" üzvlərinin siyasi məhbus hesab edildiyini bildirirlər. Onların məlumatına görə, hazırda Azərbaycanda 400-ə yaxın siyasi məhbus var. Rəsmilər isə bu iddiaları rədd edərək, bu şəxslərin törətdikləri əməllərə görə mühakimə olunduğunu bildirirlər.