Həbsdə Olan Hüquq Müdafiəçisi Effektiv Tibbi Yardım Olmadığından Şikayətlənib

Anar Məmmədli

Yaxınlarının bildirdiyinə görə, Azərbaycanda həbsdə olan hüquq müdafiəçisi Anar Məmmədliyə effektiv tibbi yardım əlçatanlığı rədd edilib.

Onların sözlərinə görə, diz oynaq xəstəliyinə görə addım atmaqda çətinlik çəkir. Məmmədlinin diz nahiyəsində güclü şişkinlik və qızartı var. Ailəsi özəl həkimlərlə məsləhətləşib. Həkimlər Məmmədlidə bursit və sinovit əlamətləri olduğunu güman edirlər.

Dəqiq diaqnoz qoyulması üçün MRT, rentgen və laboratoriya müayinələri tələb olunur. Lakin Məmmədli artıq 17 aydır ki, keyfiyyətli tibbi yardımdan məhrum edilib. Vəkili dəfələrlə Məmmədlinin mülki klinikada hərtərəfli müayinəsinə icazə verilməsi üçün müraciət etsə də, rədd cavabı alıb.

Hüquq müdafiəçisinin atası deyib ki, "Əgər Anar Məmmədli normal saxlama şəraiti, lazımi müayinə və müalicə ilə təmin olunmazsa, onun məhkəmə prosesində iştirakı qeyri-mümkün olacaqdır."

Penitensiar Xidmətin nümayəndələri şərh üçün əlçatan olmayıblar.

Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli 2024-cü il aprelin 29-da Bakıda saxlanılıb və "Abzas Media" nəşrinin əməkdaşlarının işi çərçivəsində qaçaqmalçılıq ittihamı ilə həbs edilib. Daha sonra Məmmədlinin işi ayrıca icraata ayrılıb. Aprelin 8-də frilanser jurnalist Anar Abdulla (Abdullayev) Bakı polisinə çağırılıb və ona Anar Məmmədlinin işi ilə bağlı ittiham elan olunub. Qaçaqmalçılıqdan başqa, onlar Cinayət Məcəlləsinin daha 7 maddəsi ilə ittiham olunublar.

Abdulla əvvəlcə polis nəzarətinə verilib, lakin avqust ayında məhkəmə onun həbsinə qərar verib.

Hər iki təqsirləndirilən şəxs hüquq müdafiəçiləri tərəfindən siyasi məhbus kimi tanınır.