Avropa Şurası və ATƏT postsovet məkanındakı siyasi məhbuslara diqqət çəkib

Avropa Şurası Parlament Assambleyasının (AŞPA) siyasi məhbuslar üzrə baş məruzəçisi Azadə Rövşən (İsveç, Sosialistlər Qrupu) və ATƏT Parlament Assambleyasının siyasi məhbuslar üzrə xüsusi nümayəndəsi Stiv Koen (ABŞ) bir gün əvvəl, 30 Oktyabrda qeyd olunan Beynəlxalq Siyasi Məhbuslar Günü münasibətilə birgə bəyanatla çıxış ediblər.

Avropa Şurasının Kommunikasiya Departamentinin press-relizində onların sözləri yer alıb:

“Martin Lüter Kinq Jr. həbsxanadan yazdığı məktubunda qeyd edirdi ki, hər hansı bir yerdəki ədalətsizlik bütün dünyada ədalət üçün təhlükədir. Bu Beynəlxalq Siyasi Məhbuslar Gününde bu sözlər bizə həqiqəti, azadlığı və insan ləyaqətini müdafiə etdiklərinə görə azadlıqdan məhrum edilmiş şəxslərə qarşı olan ümumi məsuliyyətimizi xatırladır. Bu gün biz bütün dünyada səsləri həbsxana divarları tərəfindən boğulan bir çox insanı anırıq. Zülm qarşısındakı cəsarətləri cəmiyyətlərimizin qurulduğu prinsipləri – söz azadlığı, fərqli düşüncə, məlumatlandırma və ictimai həyatda qorxu və repressiya olmadan iştirak etmək kimi təməl hüquqları təcəssüm etdirir."

Rövşən və Koen qeyd ediblər ki, azadlıq uğrunda mübarizə dövlət sərhədləri ilə təcrid olunmayıb. "Minskdən Moskvaya, Tiflisdən Bakıya qədər repressiya hekayələri davam edir. Biz Belarusda Nobel Sülh Mükafatı laureatı Ales Belyatskinin və Rusiyada Aleksey Qorinovun davam edən həbsindən dərin narahatlıqla izləyirik. Bu cəsur insanlar insanlığı və sarsılmaz inancları təcəssüm etdirir, avtoritar rejimin zülmətində işıq mayakı kimi xidmət edirlər. Biz həmçinin, həqiqətə və ədalətə sadiqliklərinə görə həbs edilmiş jurnalistlər olan Gürcüstandan Mziya Amaqobelinin və Azərbaycandan Ülvi Həsənlinin Vatslav Havel İnsan Haqları Mükafatına namizədliklərini də vurğulayırıq," deyə Avropa Şurası və ATƏT nümayəndələrinin bəyanatında bildirilib.

Onlar həmçinin, Rusiyanın nəzarətində olan Ukraynanın işğal altındakı ərazilərində "fars məhkəmə proseslərindən sonra siyasi motivli ittihamlarla məhkum edilmiş" Ukrayna vətəndaşları və ATƏT-in keçmiş əməkdaşları olan Vadim Qolda, Maksim Petrov və Dmitri Şabanovun dərhal azad edilməsinə çağırıblar.

"Bunlar minlərlə addan sadəcə bir neçəsidir. Siyasi məhbusların acınacaqlı vəziyyəti müxalifəti yatıran və fərqli düşüncəni cinayət hesab edən rejimlərə qarşı ittihamdır," deyə Rövşən və Koen vurğulayıblar.

Avropa Şurası və ATƏT nümayəndələri bütün dövlətləri öz beynəlxalq öhdəliklərini yerinə yetirməyə, sui-istifadə halları barədə araşdırma aparmağa və siyasi motivli ittihamlarla saxlanılanları azad etməyə çağırıblar.

Sənədin sonunda qeyd olunur: “Ədalətin rədd edildiyi yerlərdə kollektiv tədbirlər görülməlidir - istər diplomatik əlaqələr, istərsə də prinsipial müdafiə və ya hüquq pozucularına qarşı məqsədli sanksiyalar olsun (...). Biz heç kimin hakimiyyətə həqiqəti dediyi üçün təqib edilmədiyi bir dünyaya sadiq qalırıq.”