Fəal Zamin Zəkinin məhkəməsi başladı

Zamin Zəki

Oktyabrın 29-da Bakı Ağır Cinayətlər Məhkəməsində "bir sıra yerli QHT-lərə qarşı" iş üzrə həbs olunan fəal Zamin Zəkinin işi üzrə hazırlıq iclası keçirilib.

İclas zamanı vəkil Günay İsmayılova fəalın təqsirinin sübutu üçün etibarlı dəlillərin olmaması səbəbindən cinayət işinə bəraətverici əsaslarla xitam verilməsi barədə vəsatət qaldırıb.

"Zamin Zəki 57 min manat (təxminən 33,5 min ABŞ dolları) "qanuniləşdirməkdə" ittiham olunur. Nə vaxtdan qrantlar "cinayət yolu ilə əldə edilmiş əmlak" sayılır? Dövlət orqanı tərəfindən qeydiyyata alınmamış qrantlardan istifadə qanunvericiliyə görə maksimum inzibati xəta kimi qiymətləndirilə bilər," - deyə vəkil qeyd edib.

Müdafiə tərəfi, cinayət işinə xitam verilmədiyi təqdirdə, Zəkinin məhkəmə istintaqı bitənə qədər heç olmasa ev dustaqlığına buraxılması barədə də vəsatət qaldırıb. Müdafiənin digər bir vəsatəti Zəkinin vəkilin yanında oturmasına icazə verilməsi ilə bağlı olub. Hakim yalnız sonuncu vəsatəti təmin edərək, işi icraata qəbul edib və əsas məhkəmə iclasını noyabrın 12-nə təyin edib.

2025-ci ilin mart ayında hələ 2014-cü ildə açılmış və 5 il əvvəl dayandırılmış "bir sıra yerli və xarici QHT-lərə qarşı" cinayət işi bərpa edilib. Cinayət işi çərçivəsində Zamin Zəki də daxil olmaqla 10 nəfər ittiham olunan qismində cəlb edilib.

Bu iş müstəqil vətəndaş cəmiyyəti institutlarının fəaliyyəti şəraitinin dayandırılmasına və onların xarici donor mənbələrindən maliyyələşdirilməsinə qarşı daha geniş kampaniyanın bir hissəsi olub.