Həbsdə olan QHT rəhbərinin qızı danışdı: "Sakit mübarizəmiz yalnız sükutla qarşılanır"

Gəncə Regional Resurs Mərkəzinin rəhbəri Asaf Əhmədovun "QHT işi" üzrə həbsindən sonra qızı Aysu Əhmədova baş verənlərlə bağlı açıqlama verib.

Sosial şəbəkədəki paylaşımında Aysu şəxsi məsələləri gizli saxlamağa üstünlük verdiyini, lakin artıq susa bilmədiyini qeyd edib.

"Mən şəxsi həyatımı paylaşmağı sevən biri deyiləm," Aysu yazıb. "Amma artıq sakit qala bilmirəm."

Aysu anasının hazırda xəstəxanada olduğunu və uzunmüddətli beyin xəstəliyi olan klastr (salxımvari) baş ağrıları ilə mübarizə apardığını bildirib. Onun sözlərinə görə, bu sağlamlıq problemi qəfil yaranaraq həyatlarını alt-üst edib.

"Anam xəstəxanadadır," o yazıb. "Ona klastr baş ağrıları diaqnozu qoyulub. Son vaxtlar bu bizi çox sarsıtdı və hər şey dəyişdi. Öyrəndik ki, bu onunla ömür boyu qalacaq bir şeydir və hər tutma ona daha çox ağrı verir."

Aysu anasının vəziyyətinin bu tutmalar zamanı çox pisləşdiyini, yaddaşına və gündəlik fəaliyyətinə təsir etdiyini deyib.

"Bu tutmalar başlayanda anam danışa, gəzə, yeyə, hətta su içə bilmir. Bu, onun həm zehni, həm də fiziki vəziyyətinə təsir edir. Adları unudur, sözləri tapmaqda çətinlik çəkir və çətinliklə düz yeriyir."

Aysu həmçinin anasının ağrılarını izləməyin ailəsinə göstərdiyi emosional təsirdən danışıb. O hesab edir ki, anasının vəziyyəti aylarla davam edən narahatlıq və stressin nəticəsidir.

"Ağrı onun səsini və hərəkətini əlindən alsa da, mən sadəcə onun yanında olmağa çalışıram. Bu birdən-birə baş vermədi; bu, aylardır yığılıb qalan bir proses idi."

O əlavə edib ki, atasının həbsdə olması ilə bütün ailənin yükü onun çiyinlərinə düşüb.

"Atam var, amma o burada ola bilmir. Anamın xəstəliyi və atamın yoxluğu hər şeyin mənim üzərimə qalması deməkdir."

Aysu bildirir ki, kiçik bacısına baxmaq, atasının həbsxanadakı ehtiyaclarını qarşılamaq, xəstəxana və evdəki digər işlər onun öhdəsindədir.

"Kiçik bacıma baxıram, atamın həbsxanada yaxşı olduğundan əmin olmağa çalışıram, xəstəxana ilə məşğul oluram və evi idarə edirəm. Bütün bunların üstünə həm də dərslərimdən geri qalmamağa çalışıram."

Aysu yazır ki, məhkəmə prosesi zamanı o və anası stresslə mübarizə aparıb güclü qalmağa çalışırdılar. İndi isə o, özünü tənha hiss edir.

"Anam və mən güclü qalmağa çalışaraq tükənmişdik, amma heç olmasa əvvəllər bir-birimizə dayaq idik. İndi isə hər şeyi tək etməyə çalışaraq, bu mübarizədə tək qalmışam."

Aysu hər hansı kömək alacağına dair ümidini itirib.

“Hüquq müdafiəçilərindən, ailə və qadın qruplarından heç bir ümidimiz yoxdur. Onlar bizə sükutla cavab verirlər.”

Asaf Əhmədov "QHT işi" ilə bağlı saxlanılan bir neçə nəfərdən biridir. Bu iş çərçivəsində vətəndaş cəmiyyətinin 15-ə yaxın nümayəndəsi həbs edilib.

Hazırda Bəşir Süleymanlı, Məmməd Alpay, Asaf Əhmədov, Zamin Zəki və Əhməd Məmmədzadə həbsdədir.

Sübhan Həsənli və Aytac Ağazadə axtarışa verilib, lakin ölkə xaricində olduqları üçün polis onları tapa bilmir. Digər şəxslər barəsində isə alternativ qəti imkan tədbirləri seçilib.

Təqsirləndirilən şəxslər ittihamların əsassız və siyasi motivli olduğunu bildirirlər.