Məhkum edilmiş jurnalist H. Babalı pensiyasından məhrum edilməsindən şikayətlənib

Hafiz Babalı

"Abzas Media" işi ilə bağlı məhkum olunmuş araşdırmaçı jurnalist Hafiz Babalı əlilliyə görə təqaüdünü almaq üçün bank hesabından istifadəsinə qoyulan qadağanın qaldırılmasını tələb edən bəyanat yayıb.

Jurnalistin "Facebook" hesabında yayılan paylaşımda o qeyd edir ki, istintaq tərəfindən pensiya hesabı da daxil olmaqla, bütün bank hesabları “qanunsuz olaraq” bloklanıb.

"Mən həbs olunanda pensiya hesabı da daxil olmaqla, bütün bank hesablarım bloklandı. Baxmayaraq ki, qanunvericiliyə görə, pensiya hesablarının həbsi yolverilməzdir, çünki bu vəsait gəlir deyil, şəxsin yaşayış minimumunu təmin edən, Dövlət Sosial Müdafiə Fondu tərəfindən ödənilən maliyyədir", - Babalının yaxınları tərəfindən idarə olunan Facebook səhifəsində yazılıb.

Babalı qeyd edir ki, oktyabrın 14-də onun vəkili pensiya hesabından qadağanın götürülməsi ilə bağlı Bakı Ağır Cinayətlər Məhkəməsinə və Bakı Apellyasiya Məhkəməsinə rəsmi müraciətlər göndərib, lakin nəticə yoxdur.

Jurnalist bildirir ki, pensiya almaqdan imtina etməklə, onu yeganə dolanışıq mənbəyindən məhrum edirlər.

Babalı məhkəmələrdən və digər dövlət orqanlarından bu məsələnin həllini gözlədiyini bəyan edir.

"Abzas Media" onlayn nəşrinin 5 əməkdaşı, o cümlədən direktor Ülvi Həsənli, baş redaktor Sevinc Vaqifqızı, tərcüməçi Məhəmməd Kekalov, müxbirlər Nərgiz Absalamova və Elnarə Qasımova, eləcə də "Turan" İnformasiya Agentliyinin iqtisadiyyat şöbəsinin müdiri, araşdırmaçı jurnalist Hafiz Babalı 2023-cü ilin noyabrı - 2024-cü ilin yanvarı aralığında xarici valyuta qaçaqmalçılığı ittihamı ilə həbs olunublar. Sonradan "Azadlıq Radiosu"nun iqtisadi şərhçisi Fərid Mehralızadə də bu iş üzrə həbs edilib.

İlkin istintaqın nəticələrinə görə, 2024-cü ilin avqustunda işin fiqurantlarına Azərbaycan Cinayət Məcəlləsinin daha altı maddəsi ilə ittiham irəli sürülüb.

Onlar ittihamları rədd edərək, jurnalist araşdırmalarına görə təqib olunduqlarını bildiriblər.

2025-ci il iyunun 20-də məhkəmə Azərbaycanın onlayn nəşri "Abzas Media"nın jurnalistlərini və əməkdaşlarını uzunmüddətli həbs cəzasına məhkum edib. Nəşrin direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı, iqtisadçı Fərid Mehralızadə hərəsi 9 il, Nərgiz Absalamova və Elnarə Qasımova hərəsi 9 il, Məhəmməd Kekalov isə 7,5 il müddətinə azadlıqdan məhrum edilib. Sentyabrın 8-də Bakı Apellyasiya Məhkəməsi hökmü qüvvədə saxlayıb.

"Abzas Media" işi 2023-cü ilin noyabrından etibarən Azərbaycanda müstəqil medianın jurnalistlərinin həbsləri seriyasının başlanğıcı oldu.

Oxşar ssenari üzrə bir neçə cinayət işi başlanılıb, o cümlədən müstəqil onlayn resursların – "Toplum Tv" və "Meydan TV" əməkdaşlarının kollektiv həbsləri olub.