Prokuror Əkrəm İmamoğlu üçün 2352 il həbs istəyir

Türkiyə Baş Prokurorluğu, İstanbul meri və Cümhuriyyət Xalq Partiyasının (CHP) prezidentliyə namizədi Əkrəm İmamoğlu ilə bağlı məhkəməyə ittiham aktı təqdim edib.

Noyabrın 11-də yayımlanan 4000 səhifəlik sənəddə İmamoğlu 142 cinayət əməlində ittiham olunur. Prokuror bu iddia edilən cinayətlərə görə 2352 il müddətinə həbs cəzası tələb edir.

İttiham aktında 402 nəfərin adı çəkilir. Onlardan 105 nəfər həbsdədir, 170 nəfər məhkəmə nəzarəti altındadır, 7 nəfər isə axtarışdadır.

İmamoğlu cinayət təşkilatı qurmaq, rüşvət almaq, çirkli pulların yuyulması, dələduzluq, ictimai əmlaka və ətraf mühitə ziyan vurmaq kimi ittihamlarla üzləşir.

Prokurorluq iddia edir ki, İmamoğlu İstanbul Böyükşəhər Bələdiyyəsinə on illik rəhbərliyi dövründə dövlətə təxminən 160 milyard Türk Lirəsi həcmində maddi zərər vurub.

İmamoğlu martın 18-də, universitet diplomunun ləğv edilməsindən bir gün sonra saxlanılıb və martın 23-də korrupsiya ittihamı ilə rəsmən həbs edilib.

İstintaq və məhkəmə dinləmələri zamanı İmamoğlu özünə qarşı irəli sürülən bütün ittihamları rədd edib.

Bu hüquqi addımlar İstanbul Böyükşəhər Bələdiyyəsi ilə bağlı aparılan araşdırmalardan sonra və CHP-nin prezidentliyə namizədi üçün ilkin seçkilər ərəfəsində baş verib.

Əkrəm İmamoğlu 2019-cu ilin mart ayından bəri İstanbulun meri vəzifəsini icra edir və Türkiyə prezidenti Rəcəb Tayyib Ərdoğanın əsas siyasi rəqibi hesab olunur.

Türkiyədə növbəti prezident seçkiləri 2028-ci ilə təyin edilib.

Reuters xəbər verir ki, prokuror milyardlarla lirə zərər vuran korrupsiya sxeminə rəhbərlik etməkdə ittiham olunan İstanbulun keçmiş meri üçün uzunmüddətli həbs cəzası tələb edir.

İmamoğlu ittihamları rədd edərək, onların siyasi motivli olduğunu iddia edir. CHP partiyası isə ittihamları "cəfəngiyat" adlandırır.

İstanbul Baş Prokuroru Akın Gürlek mətbuat konfransında ittiham aktını açıqlayaraq bildirib ki, keçmiş mer də daxil olmaqla 402 nəfər cinayət təşkilatı qurmaqda, rüşvətxorluqda, dələduzluqda və tender pozuntularında ittiham olunur. Gürlek deyib ki, bu şəbəkə on il ərzində Türkiyə dövlətinə 160 milyard lirə (təxminən 3,8 milyard dollar) zərər vurub.

CHP-nin İstanbul təşkilatının rəhbəri Özgür Çelik X platformasında ittiham aktını mənasız və utancverici adlandırıb, bunun İmamoğlunun prezidentlik ümidlərini məhv etməyi hədəflədiyini iddia edib.

İstanbul Bələdiyyəsi və İmamoğlunun vəkilləri şərh sorğularına cavab verməyiblər.

Həmçinin, İstanbul prokuroru Ali Məhkəmədən CHP-nin bağlanmasını tələb edərək, partiyanın qeyri-qanuni vəsaitlərlə maliyyələşdirildiyini və fəaliyyətinin qadağan olunmuş hərəkətlərdən ibarət olduğunu iddia edib.

İmamoğlu mart ayından bəri korrupsiya ittihamı ilə həbsdədir. İyul ayında ona şəhər baş prokurorunu təhqir və hədələməyə görə ayrıca həbs cəzası verilib ki, bu hökmdən apelyasiya şikayəti verilib.

Hökumət ittihamların siyasi motivli olması iddialarını rədd edir və Türkiyə məhkəmələrinin müstəqil olduğunu bildirir.